Skimanir
Skimun fyrir frumubreytingum og krabbameini í leghálsi
Skimanir fyrir leghálskrabbameini eru framkvæmdar á heilsugæslustöðunum á höfuðborgarsvæðinum. Markmið skimunar er að greina forstigsbreytingar í frumum sem geta þróast í krabbamein seinna ef ekkert er aðhafst. Ef frumubreytingar greinast er þeim fylgt eftir á fyrifram skilgreindan hátt.
Ljósmæður stöðvarinnar taka sýnin og hafa fengið viðeigandi fræðslu og þjálfun. Sýni eru tekin á miðvikudögum.
Miðað er við að konum sé boðin skimun fyrir leghálskrabbameini á þriggja ára fresti á aldursbilinu 23-29 ára og á fimm ára fresti á aldursbilinu 30-64 ára.
Boðsbréf eru send til kvenna á þessum aldri.
Hægt er að panta tíma eða bóka beint í Heilsuveru eða hringja í síma 595 1300
Allir þeir einstaklingar sem eru með legháls og hafa stundað kynlíf, óháð kyni og kyni rekkjunauts, ættu að mæta reglulega í skimun samkvæmt skimunarleiðbeiningum landlæknis.
Kvennadeild Landspítala og kvennadeild Sjúkrahússins á Akureyri, sinnir og fylgir eftir konum sem þurfa nánari greiningu og eftirlit vegna ákveðinna frumubreytinga í leghálsi
Nánari upplýsingar
Bæklingur frá Embætti landlæknis um Skimun fyrir leghálskrabbameini
Upplýsingar á Heilsuveru um skimanir fyrir leghálskrabbameini
Skimun fyrir brjóstakrabbameini
Landspítala hefur verið falin framkvæmd skimana fyrir krabbameini í brjóstum frá 1. janúar 2021 í samvinnu við Sjúkrahúsið á Akureyri. Húsnæði að Eiríksgötu 5 á 3. hæð hefur verið endurnýjað og búið öllum nauðsynlegum búnaði.
Miðað er við að konum sé boðin skimun fyrir brjóstakrabbameini að jafnaði á tveggja ára fresti á aldrinum 40-69 ára en á 3 ára fresti frá 70-74 ára. Með skimun er átt við skoðun hjá einkennalausum konum.
Panta tíma í skimun fyrir brjóstakrabbameini
Einkennalausar konur 40 til 74 ára sem hafa fengið boðsbréf í skimun fyrir brjóstakrabbameini geta pantað sér tíma.
Tímapantanir fara fram á Brjóstamiðstöð Landspítala í síma 543-9560 milli klukkar 9:00 og 15:30 alla virka daga.
Einnig er hægt að panta á vef Brjóstamiðstöðvarinnar eða senda fyrirspurn á netfangið brjostaskimun@landspitali.is.
Konur með einkenni frá brjóstum og kvenlíffærum
Konum með einkenni frá brjóstum og kvenlíffærum er ráðlagt að leita til læknis.
Skimun fyrir krabbameini í brjóstum og leghálsi er forvörn sem býðst einkennalausum konum.
Meiri upplýsingar má fá um skimanir og ráðleggingar á eftirfarandi síðum:
Samhæfingarstöð krabbameinsskimana (heilsugaeslan.is)
Um krabbamein frá Krabbameinsfélaginu
Skimun fyrir krabbameini – Embætti landlæknis (landlaeknir.is)
Opnunartími
